********************************
ثلاثين سنه في الحج الماضي
ولاني قادر يوم أنساك
إن شاءالله تكون على ولدك راضي
إن شاء الله تكون في الجنّه هناك
***
يابويه نهاري بعدك ليل
ياليتني ياحبيبي قبالك
وأفرش لك خدي عالأرض
وأخلي الخد الثاني نعالك
***
ثلاثين سنه وأنا أبكي عليك
حنين وشوق لتراب رجليك
***
أنا لوكان يابويه بيدي
كنت اختار الموت على بعدك
وكنت بكل خضوع الدنيا
أحني راسي وأبوس على يدك
***
كنت ألُمَّك هنا في ذراعي
وأغيِّب نفسي في أحضانك
وأحكي لك عن كل أوضاعي
وأروي الظما من نهر حنانك
***
ثلاثين سنه ماهي شيء قليل
يتفارق فيها خليل وخليل
***
شوف قد إيش وحشني كلامك
وأنا وأخواتي وأمي معاك!
تجمعنا في ظلك ومقامك
والكل يتسابق لرضاك
***
وإنت تمسك لي الإبريق
تقول ياضنايا تعال أتوضى
نصلي الصبح ونفُك الريق
ونشيل الزنبيل نتقضى
***
ثلاثين سنه واليوم بألف
ياأندى وأطرى وأعطر كف
***
ترخص لي الغالي وتعطيني
من قلبك حتى تهنيني
لو توبك كنت تسخى تبيعه
لو جلدك حتى تغطيني
***
من ليلة ما إنهز المهد
وفي عيونك إحنا الأحلام
ولو جانا لو لفحة برد
تسهر إنت ونحن ننام
***
ثلاثين سنه وأنا أحلم بيك
الله يقدرني عشان ارضيك
***
يا أغلى من الروح والدم
يا أحلى مانطق الفم
ليتيمك مايملى مكانك
لاخال ولا عمّه ولاعم
***
إنت لحالك كون لحالك
يامغرقنا في نهر افضالك
شوف كم سنه وإنت بعيد
وإحنا بنتمتع في حلالك
***
ثلاثين سنه وإنت ياغالي
عمرك مافارقت خيالي
***
كنت أشوف الدمعه في عينك
وأنينك في الصدر حبيس
وإنت تقول لي بيني وبينك
نفسي أشوفك ياإبني عريس
***
نفسي أشيل ولدك بإيدي
وألفرحه دم يملا وريدي
وأأذن في إذنه وأسميه
وأقول للناس شوفو حفيدي
***
ثلاثين سنه ياوجه السعد
فيها صغيرك أصبح جد
***
شوف أحفادك شايلين إسمك
بلونك وشعرك وتكوين جمسك
رسمة وجه الواحد فيهم
ماتفرق شعره عن رسمك
***
سامحني يابويه أنا قصرت
وطبعاً ما أقدر أوفيك
الله يغفر لك ويسامحك
وخالد في الجنه يخليك
***
ثلاثين سنه وأنا أدعي المولى
مثواك الفردوس الأعلى
***
يللي أبوك لسه موجود
الحق . أقرب الصق فيه
الفرصه لو راحت ماتعود
بيع الدنيا عشان ترضيه
***
أسمع منه دعوه كريمه
والحق أكسب رضا والديك
مافي الدنيا شيء له قيمه
يساوي كلمة يرضى عليك